Hemen zaude

Hasiera › Forums › EITB

BERRIA: EITBko erredakzio kontseilua: «Bada garaia estilo liburu bat izateko»

Al, 2012/05/07 - 08:52 — Nagusia

Testuak hainbat arlotako adituen parte hartzea behar duela diote, aniztasuna egoki islatzeko

EITBko zuzendaritzak erredakzioaren estatutuaren zirriborroa aurkeztu zion joan den astean administrazio kontseiluari. Orain, administrazio kontseiluaren lan batzordeak aztertuko du testua, eta, ondoren, edukiaren inguruko txostena idatziko dute. 
 
Asteazken honetan, berriz, BERRIAk erreportaje bat argitaratu zuen erredakzioaren estatutua eta estilo liburuarekin dauden gorabeheren berri ematen. Argitaratu zen informazioaren arabera, zuzendaritzak EHUko hiru irakasleri enkargatutako estilo liburuak aurrera egingo du. Eta horren truke, EITBko zuzendaritzak erredakzioaren estatutua onartuko du.

 
Hori ez dela horrela argitu nahi izan dute EITBko behin-behineko erredakzio kontseiluko kideek. Egunotarako iragarri zuen Alberto Surio EITBko zuzendari nagusiak estilo liburuari ekarpenak egiteko parte hartze deialdia. Horren harira, honako erantzun hau eman du EITBko behin-behineko erredakzio kontseiluak: «Uste dugu badela garaia EITB taldeak albistegietarako estilo liburu bat izateko. Gure eguneroko lanean ezinbesteko tresna izan beharko luke». Hala ere, kontseilu horrek ez du parte hartu estilo liburuaren lanketan. «Eta ez dugu parte hartuko ere, harik eta estatutuak onartu eta erredakzio kontseilua izendatu arte». Erredakzioaren estatutuaren gainean duten oinarrirako akordioaren arabera, erredakzio kontseiluei edo euren bitartez izendatutako erredakzioko ordezkariei dagokie estilo liburuaren eztabaidan parte hartzea.
 
Urtebete baino gehiago da EITBko zuzendaritzak EHUko hiru irakasleri agindu ziela estilo liburuaren lanketa: Mari Jose Cantalapiedra, Begoña Zalbide eta Rosa Martin. Enkargua hiru irakasleri egin izana ez zuten begi onez ikusi irrati eta telebista publikoko kazetari askok. Eta gaur egun ere desadostasunak daude gaiaren inguruan.
 
EITBko behin-behineko erredakzio kontseiluaren ustez, estilo liburuaren testuak hainbat alorretako adituen parte hartzea beharko luke, «gizartearen aniztasuna egoki islatzeko». Kontseiluarentzat estilo liburua izatea garrantzitsua den arren, bizi luzea izan dezan baldintza batzuk bete behar ditu: «Esparru politiko osoaren bultzada ere behar duela deritzogu. Estilo liburuak denboran irauteko helburua izan behar du, eta ez unean uneko gehiengo politikoaren neurrikoa izan».
 
Baldintzei eta prozedurari begira, azken zehaztapena egin nahi du EITBko behin-behineko erredakzio kontseiluak: «Gure ustez ez da unea, ezta prozedura ere, estilo liburuaren proiektu hori egiteko, aipaturiko baldintzak betetzen ez diren bitartean».
 
Azkeneko egunetan ETBko kazetari batzuek idatzizko kritikak egin dizkiote EITBko behin-behineko erredakzio kontseiluari zuzendaritzarekin izandako negoziazioak «iluntasunez eta gardentasunik gabe» egitea leporatuz. Kontseilu horren asmoa «diskrezioa» izan dela erantzun dute. Eta arestian azaldutako iritziekin erantzun diete orain erredakzioko kazetariei. 
 
«Informazio neutroa»
 
EHUko hiru irakaslek landu duten estilo liburuaren zirriborroak gertakarien balorazioa ez egiteko eta informazio neutroa emateko eskatzen du, iritzirik gabekoa izan dadila, alegia. Errugabetasun eskakizuna kontuan hartzea, eta kontakizun kontrastatu eta orekatuak eskatzen ditu testuak. «EITBko profesionalek herritarrek egia ezagut dezaten bitarteko izan behar dute», jasotzen du artikulu batek. Halaber, kazetariei onartzen zaie komunikazioaren printzipio etikoaren aurka doazen informazioetan ez parte hartzeko aukera. Eta horrek ez lieke zigorrik edo kalterik ekarriko.
 
URTZI URKIZU - BERRIA 2012.05.07
EITB
Al, 2012/05/07 - 08:54 — Nagusia

EITBko zuzendaritzak erredakzioko estatutuaren zirriborroa aurkeztu dio Administrazio Kontseiluari. Horren truke, estilo liburua onartu beharko dute kazetariek.

Alberto Suriok joan den astean aurkeztu zuen administrazio kontseiluan erredakzioko estatutua. / EITB
Aurten 30 urte beteko dituzte ETBk eta Euskadi Irratiak. Eta aurreneko aldiz estilo liburu bat izango du EITBk. EHUko hiru irakasle aritu dira testua lantzen: Maria Jose Cantalapiedra, Begoña Zalbide eta Rosa Martin. EITBko zuzendaritzak irakasleei enkargua egin zienean, taldeko kazetari askok ez zuten begi onez ikusi. Hiru irakasleak ETBko behin-behineko Erredakzioko Kontseiluko kideekin harremanetan jarri ziren, parte hartzea proposatzeko. Kontseilu horren arabera, hasiera batean, liburuaren lanketak ez zuen irten behar EITBren eremutik. 
 
Baina, EITBko zuzendaritzaren eta ETBko behin-behineko Erredakzioko Kontseiluaren arteko negoziazioen ostean, Estilo Liburua aurrera ateratzea lortu dute. Horren truke, EITBko zuzendaritzak erredakzioko estatutua onartuko du. Estatutu horren zirriborroa joan den astean aurkeztu zion Alberto Suriok EITBko Administrazio Kontseiluari. Orain, Administrazio Kontseiluaren lan batzordeak aztertuko du testua, eta, ondoren, edukiaren inguruko txostena idatziko dute. Zuzendaritzak ekarpen horiek kontuan hartzen dituenean, EITBko hedabide guztietako erredakzioei aholkua eskatuko diete. Ondoren, Administrazio Kontseiluari aurkeztuko diote, eranskin eta ekarpenekin, onar dezan. 
 
Erredakzioko estatutua sortu den moduarekin haserre daude EITBko hainbat kazetari. Testua erdara hutsean zabaldu izana, eta negoziazioa iluntasunez eta gardentasunik gabe egin izana leporatzen diote ETBko behin-behineko Erredakzio Kontseiluari. Eta estilo liburua lantzeko orduan zuzendaritzari «txeke zuria» ematea egozten diote. ETBko behin-behineko Erredakzio Kontseiluarentzat, «diskrezioa» izan da haien asmoa. Estilo liburuari dagokionez, esan dute kontseilukideei ez ezik erredakzioari ere egingo zaiola kontsulta. «Mugatu barik, zabaldu egiten da parte hartzea».
 
Estilo liburua, generikoa
 
EHUko hiru irakasleek aurkeztu duten estilo liburuaren zirriborroa deontologia profesionalari buruzkoa da, zehaztasun gutxikoa. Arlo teorikoan, informazioa eta iritzia bereiztea jasotzen du. «EITBko profesionalek herritarrek egia ezagutu dezaten bitarteko izan behar dute», jasotzen du testuko artikulu batek. Kontzientzia klausulari dagokionez, honakoa dio: «Informatzaileak babestu egiten dira orientazio informatibo edo ideologikoen aldaketa nabarmen batetik. Kazetariei aitortzen zaie komunikazioaren printzipio etikoaren aurka doazen informazioetan ez parte hartzeko aukera, eta horrek ez lieke zigorrik edo kalterik ekarriko». Ez zen halakorik bete 2010eko urrian: ETBko Politikako arloburu Juan Carlos Viloriak berak idatzitako testua inposatu nahi izan zion erredaktore bati. Kazetariak ez zuen halakorik onartu. Eta ETBko zuzendaritzak espedientea zabaltzeko mehatxua egin zien Maite Zurikarai eta Jasone Agirre kazetariei. EITBko langileen protesta eta elkarretaratzeen ostean, azkenean, hitzezko errieta batean gelditu zen mehatxua.
 
Estilo liburuaren zirriborroak, halaber, gertakariak ez baloratzeko eta informazio neutroa emateko eskatzen du, iritzirik gabekoa. Errugabetasun ustekizuna eta kontakizun kontrastatu eta orekatuak ere eskatzen ditu zirriborroak.
 
Erredakzioko estatutua
 
Erredakzioko estatutua onartu ahal izateko, EITBko Administrazio Kontseiluaren oniritzia jaso beharko du. Eta erredakzioko profesionalen gehienek baiezko botoa eman beharko diote, bi hereneko gehiengo kualifikatuarekin.
 
Estatutu horrek hainbat eskubide eta betebehar ezartzen dizkie ETBko kazetariei: 9. artikuluaren arabera, informazioa eta iritzia bereiziko dituzte; berdintasun, askatasun, pluralismo eta tolerantzia balioak sustatuko dituzte, eztabaida demokratikoa eta iritzi guztien adierazpen askea erraztuz. Printzipio deontologikoen artikuluen barruan, informazioak iturri kopuru nahiko batekin egiaztatu beharko dituzte; gertaeren kausak eta ondorioak testuinguruan jarri beharko dira, ahalik eta ikuspuntu gehienekin; errespetatu egingo da pertsonen eskubidea informazioa ez eman eta galderei ez erantzuteko; ezingo dira profesionalak informazio saioetan publizitatea egitera behartu, EITBko saioen autopromozioa salbu; errugabetasun eskakizuna zehatz-mehatz aztertuko da; adingabeen informazioak bereziki zainduko dira; edozein ekintza terroristaren biktimak zorroztasunez, errespetuz eta sentsibilitatez tratatuko dira; profesionalek ardura eta zorroztasunez jokatuko dute, topikoak eta estereotipoak saihestuz; EITBko profesional guztiek, bestalde, bere lanaren jabetza intelektuala izango dute. 
 
Profesionalek, halaber, kontzientzia klausula erabili ahalko dute, estatutuaren 32. artikuluaren arabera. Eta, 45. artikuluak dioenez, profesionalek edukiak askatasunean landuko dituzte, estatutuko printzipio deontologikoei eta estilo liburuari jarraituz.
 
URTZI URKIZU - BERRIA 2012.05.02

Harremanetarako: e i t b @ l a b . e u s

EITB taldeko eta kontratetako langileentzako posta zerrenda bat ere badugu, lehen eskuko informazioa banatzeko: batzorde bilerak, prentsa artikuluak, ekimenak, premiazko deialdiak... Harpidetzeko goian agertzen den helbidera mezu bat bidali, izena aipatuz eta harpidetu beharreko e-posta helbidea adierazita. Bestetik, ezkerreko menuaren goikaldean ageri den bezala RSS, twitter, eta facebook kontuak ere baditugula kontutan hartu.

LAB-EITBk webgune honetan agertzen diren albiste eta artikuluekin ez du zertan bat etorri beharrik, harik eta geuk sinatutakoak ez badira noski. Publikazio horiek interesgarriak edota eztabaidetareko baliagarriak izan daitezkeelakoan argitaratzen ditugu.