EITBren webgunearen informazio korporatiboaren barruan dokumentu bat aurkitu berri dugu, iaz Gasteizko Parlamentuak egindako eskaerari atzerapenez jarraitzeko itxuraz. PDFaren izenburua «Gardentasuna ordainsarien politikan eta plantillaren gestioan» du, baina LABeko sail sindikalaren ustez edukia ez zaio izenburuari behar adina hurbiltzen. Izan ere ustezko gardentasuna saltzeko amarru zaharra erabili du zuzendaritzak: informazio apaingarri eta nahas asko eman arazoak errazago ezkutatzeko.
Kudeatzaile kopuruaz:
-
Ez dira agertzen izendapen libreko kudeatzaile guztiak. Berriro mugatzen da lehen eta bigarren mailako 75 kudeatzaileetara. Aurtengo martxoan 113 inguru ziren.
-
75 horietatik 49 (%65) “plantilla finkokoak” direla eta gainontzekoak kargurako kontratatuak izan direla baieztatzen da. Ezkutatzen dena da beste %35ak lan kontratu mugagabea duela, kanpo deialdirik gainditu gabe.
Ordainsariei dagokionean:
-
Zuzendari hauek EITBko gainontzeko langileek bezalaxe Lan Hitzarmenen ordainsarien xedapenen menpe daudela esaten da. Baieztapen hori zalantzan jartzen dugu ez baitago jakiterik Hitzarmenetatik kanpoko bestelako osagarririk jasotzen den.
-
Ez da azaltzen zein osagarri jasotzen den ardura bakoitzean. Langileon soldatak eta osagarriak bestalde, era garbiagoan publikatzen dira, enpresa publikoetan behar den bezala.
-
Grafiko eta datu ugari eskaintzen da, baina soilik batez besteko soldatak agertzen dira, ardura bakoitzari zein ordainsari kontzeptu eta kopuru egokitzen zaion.
Gaitasunei buruz:
Arestian esan bezala paragrafo luzeetan disimulatzen dira arazoak. Ulertzekoa izan liteke EITBren sorreran hizkuntz eta titulazio eskakizun guztiak betetzeko gai izan zitekeen jendea aurkitzea, baina gaur egun berdintasun, gaitasun eta merituen printzipioak ez betetzeko aitzakiarik ez dago. Are gutxiago erdi eta goi mailako titulazioa duten langileen taldeak kudeatu behar direnean.
-
“Elebiduna” edo “eleanitza” aipatzerakoan ez da zehazten zein hizkuntzak diren menperatzen direnak, ezta zein mailatan. Adibidez, ingelesa maila bat edukitzea eta gaztelaniaz jakitea nahikoa da “elebidun” bezala hartzeko, euskaraz dakiela ulertu arazi nahi denean.
-
Oso bitxiak dira titulazio gabeziak ez aipatzeko erabiltzen diren esamoldeak, jendarteko hainbat arlotan izandako esperientziak azaltzerakoan. Euskararekin bezala, hemen ere ez dira kasu gutxi.