Hemen zaude

Hasiera › Forums › Langile Batzordeak

ETBko Langile Batzordea NAVARRA DIRECTO saioko kaleratzeen aurka, eta ETB osoa Nafarroan LTD bidez ikustearen alde dago

Al, 2012/01/16 - 17:36 — Nagusia

PRENTSA OHARRA:

ETBko Langile Batzordea NAVARRA DIRECTO saioko kaleratzeen aurka, eta ETB osoa Nafarroan LTD bidez ikustearen alde dago.

    Euskal Telebistako Langile Batzordeak, NAVARRA DIRECTO saioa egiteko kontratako 12 langile kaleratuak izango direla jakin duenean, honako adierazpena plazaratzea adostu du:

1. Lehenengo eta behin, kaleratuak izango diren langileekin elkartasuna adierazi nahi dugu.

2. ETBko Langile Batzordeak saio hori ezinbestekotzat jotzen du ETBk nafar jendarteari ere eskaintzen dion zerbitzu informatibo aproposaren bidean, telebista publikoak eskaini behar duen ildotik.

3. Ez dugu ulertzen nola ETBko zuzendaritzak uko egiten dion Nafarroan LTD sarea hedatzeari, bere ikuslego naturalaren laurden bati bizkar emanez. Ikuspegi ekonomiko batetik ere, ulergaitza da edozein enpresak horrelako erabakia hartzea. Hau da, bere bezero potentzialaren zati esanguratsu bat galtzea onartzea arrazoi ideologikengatik. LTDaren azpiegitura gabe NAVARRA DIRECTO saioa ere desagertuko da.

4. ETBko zuzendaritzari zera exijitzen diogu, bai saioa gutxienez berean mantentzeko, egitura guztia eta langile guztiekin, eta ETBko kate guztiak Nafarroan LTD bidez hedatzeko baliabideak jartzeko behingoz.

Euskal Telebistako Langile Batzordea, 2012ko urtarrilaren 16an

Langile Batzordeak
Ar, 2012/01/17 - 08:47 — Nagusia

Miguel Sanzek eta Patxi Lopezek Nafarroan ETBren presentzia normalizatzea hitzartu zuten 2009ko uztailean. / JAGOBA MANTEROLA / ARGAZKI PRESSETBko langile batzordeak exijitu du Nafarroan kate guztiak jartzea

LAB: «UPNren esanek garbi utzi dute borondate politikoa dela kontua, eta ez ekonomikoa»
URTZI URKIZU - BERRIA 2012.01.17
 
ETBko langile batzordeak Navarra Directo saiotik kaleratuko dituzten langileei elkartasuna adierazi die, ohar baten bitartez (hilaren 27an hamabi langile kaleratuko dituzte). «ETBko langile batzordeak saio hori ezinbestekotzat jotzen du ETBk nafar jendeari ere eskaintzen dion informazio zerbitzu aproposaren bidean, telebista publikoak eskaini behar duen ildotik». Bestalde, langileek ez dute ulertzen nola ETBko zuzendaritzak uko egiten dion Nafarroan LTD sarea hedatzeari, eta «bere ikuslego naturalaren laurden bati bizkarra ematen». Ikuspegi ekonomiko batetik ere, edozein enpresak horrelako erabakia hartzea ulergarritzat jotzen du langile batzordeak. «Hau da, bere bezero potentzialaren zati handi bat galtzea onartzea, arrazoi ideologikoengatik». Hala, langile batzordeak ETBko zuzendaritzari exijitu nahi dio Navarra Directo programari bere horretan eusteko, egitura eta langile guztiekin. «Eta ETBko kate guztiak Nafarroan LTD bidez hedatzeko baliabideak jartzeko, behingoz».
 
EITBko LABek, era berean, Nafarroako Gobernuak eta ETBk erabili zuten negoziaziorako dokumentu teknikoa lortu eta jarri du sarean (http://eitb.labsindikatua.org). Dokumentuan jasotzen denez, azpiegitura teknikoaren gastua 2010erako 856.000 eurokoa izango litzateke, gehi BEZ eta kanon zergak edo tasak. EAko militante batzuek euren aldetik hedagailu bat jartzeagatik sortutako iskanbilaren inguruan, berriz, UPNko arduradunen esanek eta Espainiako Gobernuaren ekimenak garbi utzi dute auzia ekonomikoa baino gehiago politikoa dela; hala uste du LAB sindikatuak. «EAEko zein Nafarroako gobernuen negoziazioaren lardaskeria ere nabarmen gelditzen da. Soilik ETB1 eta ETB2 aurreikusten ziren, dagoeneko ETB3 eta ETB4 martxan zeudenean. ETB3 euskara hutsez eta nafar gazteentzat oso garrantzitzua izan daitekeenean».
 

Harremanetarako: e i t b @ l a b . e u s

EITB taldeko eta kontratetako langileentzako posta zerrenda bat ere badugu, lehen eskuko informazioa banatzeko: batzorde bilerak, prentsa artikuluak, ekimenak, premiazko deialdiak... Harpidetzeko goian agertzen den helbidera mezu bat bidali, izena aipatuz eta harpidetu beharreko e-posta helbidea adierazita. Bestetik, ezkerreko menuaren goikaldean ageri den bezala RSS, twitter, eta facebook kontuak ere baditugula kontutan hartu.

LAB-EITBk webgune honetan agertzen diren albiste eta artikuluekin ez du zertan bat etorri beharrik, harik eta geuk sinatutakoak ez badira noski. Publikazio horiek interesgarriak edota eztabaidetareko baliagarriak izan daitezkeelakoan argitaratzen ditugu.